لا مکاں چھپ نہ سکا یار تمہارا ہم سے

لا مکاں چھپ نہ سکا یار تمہارا ہم سے

اب تو ہر آن ملا کرتے ہو ہرجا ہم سے

چھپتے ہو سامنے کے سامنے کیا کیا ہم سے

واہ جی بھول بھلیاں کا تماشہ ہم سے

دیکھنے والے تمہیں دیکھتے ہیں ہر شے میں

اب یہ بتلاؤ کہاں چھپتے ہو کس جا ہم سے

بے حجابی نے کیا ہے تمہیں خود پردے میں

ہیں پوچھے تو سہی آپ کا پروا ہم سے

اول آخر ہو تمہیں ظاہر و باطن ہو تمہیں

لا مکاں کہتے ہو کیوں اپنا ٹھکانہ ہم سے

لن ترانی نہ سنی آپ کی اڑبازوں نے

نہ چھپا آپ کا آخر کو تجلیٰ ہم سے

اک زمانہ تھا اسے ڈھونڈھتے تھے ہم غوثیؔ

اب تو اپنا ہی پتہ خود نہیں چلتا ہم سے