سچ یہ ہے عیش دو عالم کی بھی پروا نہ کریں

سچ یہ ہے عیش دو عالم کی بھی پروا نہ کریں

وہ جو توہین غم یار گوارا نہ کریں

دل کی دھڑکن کو بھی اب کام میں لایا نہ کریں

کیا اس انداز سے بھی تم کو پکارا نہ کریں

وہ اگر مست نگاہوں سے اشارہ نہ کریں

ان کے مے خوار کبھی ہوش میں آیا نہ کریں

ہو ہی جائے گی کسی طرح شب غم کی سحر

آپ میرے لئے تکلیف گوارا نہ کریں

ابھی امید کو دنیا ہے تصور کا فریب

دل کی دنیا کو ابھی وہ تہ و بالا نہ کریں

اور ہنستے ہیں مرے حال پریشاں پہ ہنسیں

آپ کو سب ہے خبر آپ تو ایسا نہ کریں

نو بہ نو رنگ بدلتی ہے تجلی ان کی

دیکھنے والے نگاہوں پہ بھروسہ نہ کریں

درد دل آپ کی آنکھوں سے عیاں ہے ماہرؔ

اس طرح آپ کوئی راز چھپایا نہ کریں