kisi se meri manzil ka pata paya nahin jata

kisī se merī manzil kā patā paayā nahīñ jaatā

jahāñ maiñ huuñ farishtoñ se bhī vaañ jaayā nahīñ jaatā

kisī sūrat-e-jahāñ hosh meñ huuñ nahīñ jaatā

mire sar se junūn-e-'ishq kā saayā nahīñ jaatā

duī kā tazkira tauhīd meñ paayā nahīñ jaatā

jahāñ merī rasā.ī hai mirā saayā nahīñ jaatā

mirī gum-gashtagī dekho ab apnī justujū meñ huuñ

unheñ khoyā hai jab se aap ko paayā nahīñ jaatā

mire TuuTe hue pā-e-talab kā mujh pe ehsāñ hai

tumhāre dar se uTh kar ab kahīñ jaayā nahīñ jaatā

mohabbat ho to jaatī hai mohabbat kī nahīñ jaatī

ye sho'la ḳhud bhaḌak uThtā hai bhaḌkā yā nahīñ jaatā

dam-e-āḳhir mirā tār-e-nafas bhī dars-e-’ibrat hai

kuchh is sūrat se uljhā hai ki suljhāyā nahīñ jaatā

vo dil tafvīz kiije jo do-'ālam se ho mustaġhnī

vo dāman chāhiye mujh ko jo phailāyā nahīñ jaatā

mohabbat ke liye kuchh ḳhaas dil maḳhsūs hote haiñ

ye vo naġhma hai jo har saaz pe gaayā nahīñ jaatā

mohabbat asal meñ 'maḳhmūr' vo rāz-e-haqīqat hai

samajh meñ aa gayā hai phir bhī samjhāyā nahīñ jaatā

kisi se meri manzil ka pata paya nahin jata

jahan main hun farishton se bhi wan jaya nahin jata

kisi surat-e-jahan hosh mein hun nahin jata

mere sar se junun-e-'ishq ka saya nahin jata

dui ka tazkira tauhid mein paya nahin jata

jahan meri rasai hai mera saya nahin jata

meri gum-gashtagi dekho ab apni justuju mein hun

unhen khoya hai jab se aap ko paya nahin jata

mere TuTe hue pa-e-talab ka mujh pe ehsan hai

tumhaare dar se uTh kar ab kahin jaya nahin jata

mohabbat ho to jati hai mohabbat ki nahin jati

ye sho'la KHud bhaDak uThta hai bhaDka ya nahin jata

dam-e-aKHir mera tar-e-nafas bhi dars-e-’ibrat hai

kuchh is surat se uljha hai ki suljhaya nahin jata

wo dil tafwiz kije jo do-'alam se ho mustaghni

wo daman chahiye mujh ko jo phailaya nahin jata

mohabbat ke liye kuchh KHas dil maKHsus hote hain

ye wo naghma hai jo har saz pe gaya nahin jata

mohabbat asal mein 'maKHmur' wo raaz-e-haqiqat hai

samajh mein aa gaya hai phir bhi samjhaya nahin jata