کسی سے میری منزل کا پتا پایا نہیں جاتا

کسی سے میری منزل کا پتا پایا نہیں جاتا

جہاں میں ہوں فرشتوں سے بھی واں جایا نہیں جاتا

کسی صورت جہاں ہوش میں آیا نہیں جاتا

مرے سر سے جنون عشق کا سایا نہیں جاتا

دوئی کا تذکرہ توحید میں پایا نہیں جاتا

جہاں میری رسائی ہے مرا سایا نہیں جاتا

مری گم گشتگی دیکھو اب اپنی جستجو میں ہوں

انہیں کھویا ہے جب سے آپ کو پایا نہیں جاتا

مرے ٹوٹے ہوئے پائے طلب کا مجھ پہ احساں ہے

تمہارے در سے اٹھ کر اب کہیں جایا نہیں جاتا

محبت ہو تو جاتی ہے محبت کی نہیں جاتی

یہ شعلہ خود بھڑک اٹھتا ہے بھڑکا یا نہیں جاتا

دم آخر مرا تار نفس بھی درس عبرت ہے

کچھ اس صورت سے الجھا ہے کہ سلجھایا نہیں جاتا

وہ دل تفویض کیجے جو دو عالم سے ہو مستغنی

وہ دامن چاہیے مجھ کو جو پھیلایا نہیں جاتا

محبت کے لئے کچھ خاص دل مخصوص ہوتے ہیں

یہ وہ نغمہ ہے جو ہر ساز پہ گایا نہیں جاتا

محبت اصل میں مخمورؔ وہ راز حقیقت ہے

سمجھ میں آ گیا ہے پھر بھی سمجھایا نہیں جاتا