سرشتِ دل سے ناواقف مذاقِ دل نہیں سمجھا

سرشتِ دل سے ناواقف مذاقِ دل نہیں سمجھا

وہ کیا سمجھا جو غم کو زیست کا حاصل نہیں سمجھا

مجھے پورا بھروسہ ہے تمہاری کار سازی پر

کسی مشکل کو میں نے آج تک مشکل نہیں سمجھا

کبھی طوفِ حرم میں تھے کبھی گردِ صنم خانہ

ہماری گمرہی دیکھو مقامِ دل نہیں سمجھا

محبت جس کو دیتے ہیں اسے پھر کچھ نہیں دیتے

اسے سب کچھ دیا ہے جس کو اس قابل نہیں سمجھا

یہ راہیں التفاتِ رہبرِ کامل سے کھلتی ہیں

ابھی یہ مرحلہ گم کردہ منزل نہیں سمجھا

مزے کی بات ہے وہ سب کو اس قابل بناتا ہے

اسی مختارِ کل نے مجھ کو اس قابل نہیں سمجھا

ہمارا حال ہے مخمورؔ مستقبل کا آئینہ

نہ سمجھا حال کو جس نے وہ مستقبل نہیں سمجھا