تیری فرقت میں جو آنسو کا بہانا ہوگا

تیری فرقت میں جو آنسو کا بہانا ہوگا

دل بیمار مرض میں بھی توانا ہوگا

ایک دن ہوگا کہ جنت میں ہمیں تم ہوں گے

میرے پہلو سے تبھی درد کا جانا ہوگا

جس کا ممکن نہیں آنا ہے مرے پاس تلک

کھینچ کر جذب محبت تجھے لانا ہوگا

مجھ کو مجبور کیے دیتا ہے دل اس کی طرف

اس نے الفت مرے دل میں کہیں ٹھانا ہوگا

شکل احمد ہوں وہ ہے قبر میں خلوت مرداںؔ

بہر پرسش نہ نکیروں کو بھی آنا ہوگا