چھڑا دیتی ہے فکر غیر سے تاثیر مے خانہ

چھڑا دیتی ہے فکر غیر سے تاثیر مے خانہ

ملی ہے عرش کی زنجیر سے زنجیر مے خانہ

پڑھو بادہ گسارو اب نماز خود فراموشی

صدائے قلقل مینا ہوئی تکبیر مے خانہ

نظر میں زاہدان خشک کی ہے خیرگی پیدا

ہوئی ہے شیشہ ہائے مئے سے وہ تنویر میخانہ

ریاکار اور خودبیں کا نہیں اس میں گزر ہرگز

عجب قدسی صفت جاری ہوئی تقدیر مے خانہ

کھڑا ہے جھومتا کوئی پڑا ہے لوٹتا کوئی

کوئی مانی سے کہہ دے کھینچ لے تصویر مے خانہ

نہ دے مینا نہ دے ساغر مجھے اس کی نہیں حاجت

نگاہ مست کافی ہے تری اے پیر مے خانہ

بلا نوشوں میں درد تہ نشیں تقسیم ہوتی ہے

سلامت با کرامت یا الٰہی پیر مے خانہ

نہ آئے گی کوئی آفت کبھی مے خانہ پر حسرتؔ

دعائے مخلصاں ہے پایۂ تعمیر مئے خانہ