عشق کا راز گر نہ کھل جاتا

عشق کا راز گر نہ کھل جاتا

اس قدر تو نہ ہم سے شرماتا

آ کے تب بیٹھتا ہے وہ ہم پاس

آپ میں جب ہمیں نہیں پاتا

زندگی نے وفا نہ کی ورنہ

میں تماشا وفا کا دکھلاتا

مر گئے ہم تو کہتے کہتے حال

کچھ تو تو بھی زباں سے فرماتا

میں تو جاتا ہی آپ سے لیکن

تیرے کہنے سے اب نہیں جاتا

سب یہ باتیں ہیں چاہ کی ورنہ

اس قدر تو نہ ہم پر جھنجھلاتا

جیسے یہ میر کا سنا ہے شعر

گر یہ بے اختیار ہے آتا

خواب میں بھی رہا تو آنے سے

دیکھنے ہی کا تھا یہ سب ناتا

میں نہ سنتا کسی کی بات حسنؔ

دل جو باتیں نہ مجھ کو سنواتا