ہے نام ترا باعث ایجاد رقم کا

ہے نام ترا باعث ایجاد رقم کا

محتاج نہیں وصف ترا لوح و قلم کا

مقدور بشر کب ہے تری حمد سرائی

کیا قطرۂ ناچیز سے اوصاف ہو یم کا

کیا جانے کہاں جلوہ نما تو ہے کہ یاں تو

ہے داغ تری یاس سے دل دیر و حرم کا

دل صاف کر آلائش دنیا سے کہ یہ دل

آئینہ ہے اسکندری و جم ہے جم کا

ٹک دیدۂ دل کھول کے تو دیکھ کہ رخشاں

ہر ذرہ حادث میں ہے خورشید قدم کا

اس ہستیٔ موہوم پہ غفلت میں نہ کھو عمر

بیدارؔ ہو آگاہ بھروسہ نہیں دم کا