ترے جلوے کی بڑھتی ہے لطافت چشم گریاں میں

ترے جلوے کی بڑھتی ہے لطافت چشم گریاں میں

کہ گھل کر اشک میں چھپتا ہے وہ دامان مژگاں میں

ہوا دھوکا جو دیکھی سبز قندیل ان کے ایواں میں

کہ سبزی ہلکی ہلکی ہے ضیائے ماہ تاباں میں

چھپا رکھیں گے داغ سینہ کو ہم وصل جاناں میں

کہ مثل صبح اک خورشید رکھتے ہیں گریباں میں

کبھی تار قفس کٹتا نہیں شہبائے ہجراں میں

نئے جوہر ہیں اے قاتل مری تیغ گریباں میں

پڑھو صابرؔ کوئی ایسی غزل بزم سخنداں میں

کہ ایسا کوئی گلدستہ نہ ہو گلزار رضواں میں