بن کر میں کبھی موسیٰ سر طور جا رہا ہوں

بن کر میں کبھی موسیٰ سر طور جا رہا ہوں

عیسیٰ میں کبھی بن کر مردے جلا رہا ہوں

وحدانیت پہ میری اب تو یقیں کر لو

ہر شکل میں میں اپنا جلوہ دکھا رہا ہوں

روشن کئے ہیں جس نے جذبات حق تعالیٰ

وہ شمع حقیقت میں دل میں جلا رہا ہوں

میں کو بجز ہمارے کوئی نہیں ہے سنتا

توحید کے وہ نغمے ہر وقت گا رہا ہوں

اپنی خبر میں گم ہوں اتنی خبر کہاں ہے

کس سمت سے ہوں آیا کس سمت جا رہا ہوں

خود ہوں میں جام و مینا خود ہی شراب وحدت

خود ہی میں پی رہا ہوں خود ہی پلا رہا ہوں

جس میں بجز ہمارے نہ ہو غیر کی سمائی

اپنا میخانۂ دل ایسا بنا رہا ہوں

دونوں جہاں بنا کر کوئی فرق ہے نہ آیا

ویسا ہی ہوں میں جیسا پہلے خدا رہا ہوں

میں ظہورؔ ہوں نہ ظاہر بندہ ہوں میں نہ مولیٰ

اپنے وجود کو بس میں خیال پا رہا ہوں