وہ مست آنکھیں دراز کاکل کماں ہے ابرو تو تیر مژگاں

وہ مست آنکھیں دراز کاکل کماں ہے ابرو تو تیر مژگاں

ہزار غمزے ہر اک ادا میں ہزار فتنے نظر میں پنہاں

وہ زلف شب گوں ہے کفر ساماں وہ روئے انور ہے عین ایماں

عزیر دونوں ہیں دل کو میرے کبھی ہوں کافر کبھی مسلماں

نگاہیں ترچھی ادائیں باکی بہ غمزہ مستی بہ ناز شوخی

نظر میں جادو بھرا ہے اس کی بچاؤں اپنا میں کیسے ایماں

غضب نگاہیں عجیب تیور ستم کا بانی وفا کا پیکر

خدا ہی حافظ ہے دین و دل کا ہر اک کرشمہ ہے دشمنِ جاں

بہ حسن یوسف بہ لب مسیحا ہے مہ جبینوں میں سب سے یکتا

بتاؤں کیسے میں نام اس کا کبھی ہے بندہ کبھی ہے یزداں

وہی ہے روح روان عارفؔ وہی ہے ایمان و دینِ عارفؔ

اسی سے روشن ہے بزم امکاں وہی چمن ہے وہی بہاراں