تمہارے کوچے میں جان جاناں نماز ہم یوں ادا کریں گے

تمہارے کوچے میں جان جاناں نماز ہم یوں ادا کریں گے

تمہی کو پوجیں گے زندگی بھر تمہی کو سجدے کیا کریں گے

حضور کے نقش پا سے ہم کو ملی ہے سجدوں کی جب اجازت

ہم اہل نسبت بتاؤ تو یہ نماز کیسے قضا کریں گے

یہی طریقہ ہے عاشقوں کا صنم کی چاہت صنم کی پوجا

یہی کیا ہے یہ کر رہے ہیں یہی ہمیشہ کیا کریں گے

زمانہ ہو جائے ہم سے بد ظن نہیں ہے پروا جو سب ہیں دشمن

نہ چھوٹے ہاتھوں سے ان کا دامن یہی خدا سے دعا کریں گے

ہمارے پاس اب ہمارا کیا ہے جو پاس ہے بھی وہ سب ہے ان کا

ہے دل بھی ان کا ہے جاں بھی ان کی انہیں پہ یہ سب فدا کریں گے

کسی کو ہوگا ہمیں نہیں شک ہم عاشقوں کا یہی ہے مسلک

صنم کی پوجا اگر خطا ہے تو بارہا یہ خطا کریں گے

چلو تو ممتازؔ سے ملیں گے وہ کشتۂ ناز سے ملیں گے

ٹھکانہ اس کا ہے کوئے جاناں وہیں پہ اس کا پتا کریں گے