اگر منظور ہے پینا مئے وحدت کے ساغر کا

اگر منظور ہے پینا مئے وحدت کے ساغر کا

لیا کر نام ہر دم حضرت ساقیٔ کوثر کا

تیری مے کی تمنا میں بنا دل ورنہ اے ساقی

جسے کہتے ہیں شیشہ وہ بھی ایک ٹکڑا ہے پتھر کا

کبھی گر خاک تیرے نقش پا کی دل سے وہ ملتا

تو شکل آئینہ دل صاف ہو جاتا سکندر کا

تیری دوری سے ہم جس آتش سوزاں میں جلتے ہیں

جو دیکھے دور سے تو آب ہو زہرہ سمندر کا

علم کا اس کے اے معروفؔ سر پر میرے سایہ ہے

نہیں ہے ایک ذرہ غم مجھے خورشید محشر کا