ان کو وہ قصے سنائے ہیں کہ جی جانتا ہے

ان کو وہ قصے سنائے ہیں کہ جی جانتا ہے

لب پہ نالے بھی وہ لائے ہیں کہ جی جانتا ہے

وہ نئے رنگ جمائے ہیں کہ جی جانتا ہے

لطف وہ عشق میں پائے ہیں کہ جی جانتا ہے

رنج بھی ایسے اٹھائے ہیں کہ جی جانتا ہے

تم نے سیکھا ہی نہیں شیوۂ ارباب کرم

یاد ہے تم کو بس انداز جفا طرز ستم

فتنے قربان ہیں جن پر یہ قدم ہیں وہ قدم

ان ہی قدموں نے تمہارے ان ہی قدموں کی قسم

خاک میں ایسے ملائے ہیں کہ جی جانتا ہے

جن کو پانا تھا انہیں پا گئیں دونوں آنکھیں

دید کا دھوکا مگر کھا گئیں دونوں آنکھیں

دیکھتے ہی انہیں شرما گئیں دونوں آنکھیں

کعبہ و دیر میں پتھرا گئیں دونوں آنکھیں

ایسے جلوے نظر آئے ہیں کہ جی جانتا ہے

ہوش اڑاتے ہیں معینؔ کے بھی ہر اک جلوے سے

دیکھ لینا ہی قیامت ہے ترا پردے سے

جو یہاں آتا ہے جاتا نہیں وہ اپنے سے

داغؔ وارفتہ کو ہم آج ترے کوچے سے

اس طرح کھینچ کے لائے ہیں کہ جی جانتا ہے