جوش دریا میں تھا کس قدر الاماں اونچا ساحل سے طوفاں کا دھارا گیا

جوش دریا میں تھا کس قدر الاماں اونچا ساحل سے طوفاں کا دھارا گیا

اس کو کہتے ہیں قسمت کی نا کامیاں پہلے کشتی گئی پھر کنارا گیا

عرش ہلنے لگا آسماں پھٹ گیا کون میدان میں آج اتارا گیا

بات کیا ہے جو محشر میں ہلچل مچی نام قاتل کا شاید پکارا گیا

موت کو پہلے اپنی تصور کرے مال و زر پر نہ کوئی تکبر کرے

ساری دولت دھری کی دھری رہ گئی جو یہاں سے گیا بے سہارا گیا

وہ جو آئے تو حسن بصیرت نہ تھا ان کے جاتے ہی تاب نظر آگئی

کل نظارہ تھا لیکن یہ آنکھیں نہ تھیں آج آنکھیں ملیں تو نظارا گیا

جس کو پالا تھا ہم نے بڑے ناز سے اک نظر ڈال کر آپ نے لے لیا

ہم سے پوچھو کہ ہم پہ گزرتی ہے کیا آپ کا کیا گیا دل ہمارا گیا

مسکرائے تو بجلی چمکنے لگی بال کھولا تو کالی گھٹا چھا گئی

ان کی آنکھوں سے مستی ٹپکنے لگی یا جوانی کا صدقہ اتارا گیا

یہ خدا جانے نازاںؔ کہاں چل دیا کوچہ کوچہ اسے میں نے ڈھونڈا مگر

دوستوں سے جو پوچھا تو کہنے لگے وہ حسینوں کی گلیوں میں مارا گیا