سن لو کہ رنگ محفل کچھ معتبر نہیں ہے

سن لو کہ رنگ محفل کچھ معتبر نہیں ہے

ہے ایک زبان گویا شمع سحر نہیں ہے

مدت سے ڈھونڈھتا ہوں ملتا مگر نہیں ہے

وہ اک سکون خاطر جو بیشتر نہیں ہے

ہو لاکھ چارہ سازی لیکن اثر نہیں ہے

ہاں در خور مداوا زخم جگر نہیں ہے

دل تھا تو ہو رہا تھا احساس زندگی بھی

زندہ ہوں اب کہ مردہ مجھ کو خبر نہیں ہے

پردہ اٹھا دے اک دن تو اے حجاب ہستی

پاتا ہوں اس کو دل میں دیکھا مگر نہیں ہے

مرنے پہ جسم خاکی کیا ساتھ روح کا دے

راہ عدم میں غافل گرد سفر نہیں ہے

کیا گو مگو ہیں اے دل اصرار بے خودی بھی

سب کو خبر ہے مجھ کو اپنی خبر نہیں ہے

دنیا سے جا رہے ہو کیا لے کے اے نظرؔ تم

زاد سفر نہیں ہے رخت سفر نہیں ہے