اس بت کافر کے در پہ اب تو جانا ہی پڑا

اس بت کافر کے در پہ اب تو جانا ہی پڑا

ہو گیا ہے بس خفا مجھ کو منانا ہی پڑا

لے گیا دل چھین کر آنکھیں ملاتے ہی میاں

فرقت دل دار میں آنسو بہانا ہی پڑا

کیا کروں کس سے کہوں سنتا نہیں فریاد کو

کوچۂ ہمدم میں اب تو غل مچانا ہی پڑا

پہنچی صدا کانوں میں جب باہر وہ آیا ماہ لقا

اب پئے تعظیم مجھ کو سر جھکانا ہی پڑا

کون ہے کیا کام ہے کیوں رات کو آیا یہاں

سب محلے والوں کو اب تو جگانا ہی پڑا

غیر کی محفل میں جا کر کرتے ہیں عیش و سرور

مجھ کو اس غیرت سے یارو مر تو جانا ہی پڑا

زندگی کا کچھ مزا مطلق نہیں مجھ کو نیازؔ

موت تو آتی نہیں اب زہر کھانا ہی پڑا