قاصد کی امید ہے یارو قاصد تو آ جائے گا

قاصد کی امید ہے یارو قاصد تو آ جائے گا

لیکن ہم اس وقت نہ ہوں گے جب ان کا خط آئے گا

کہتے ہیں کس کو درد محبت کون تمہیں بتلائے گا

پیار کسی سے کر کے دیکھو خود ہی پتا چل جائے گا

تھام کے دل رہ جائیں گے وہ دیکھ کے میری میت کو

میرا جنازہ جب کہ نکل کر ان کی گلی سے جائے گا

ٹھوکر کھانے والے راہی اس میں خطا رہبر کی نہیں

جو نہ چلے گا دیکھ کے رستہ راہ میں ٹھوکر کھائے گا

لٹنے کا افسوس بجا ہے لیکن اے لٹنے والو

کس کو خبر تھی قافلہ آ کر منزل پہ لٹ جائے گا

شیشۂ دل اس بت نے توڑا پرنمؔ اس میں حیرت کیا

ٹوٹ ہی جائے گا جو شیشہ پتھر سے ٹکرائے گا