سنو اے مومنوں رمضان عظمت کا مہینہ ہے

سنو اے مومنوں رمضان عظمت کا مہینہ ہے

یقیناً خیروبرکت اور رحمت کا مہینہ ہے

رسول‌ اللہؐ پر قرآن اترا اس مہینے میں

نزول فضل خالق کا اطاعت کا مہینہ ہے

زکوٰۃ و روزہ کے ارکان ہوتے ہیں ادا اس میں

سخاوت عام ہوتی ہے سخاوت کا مہینہ ہے

حدیث رحمت للعالمیں سے صاف ظاہر ہے

یتیموں بے نواؤں پر عنایت کا مہینہ ہے

منور نور ایماں سے یہ کر دیتا ہے سینوں کو

خدائے پاک و برتر کی عبادت کا مہینہ ہے

عبادت میں کرو کثرت ثوابوں میں بھی کثرت ہے

کرو یاد خدا ہر دم ریاضت کا مہینہ ہے