کیجیے لطف و کرم اے جان من

کیجیے لطف و کرم اے جان من

تابکے جور و ستم اے جان من

بزم میں ہم آپ کی پھر آ گئے

لے کے امید کرم اے جان من

آپ تو کر کے تعلق منقطع

شاد ہیں ناشاد ہم اے جان من

توڑ دو تم ہم نہ توڑیں گے کبھی

ہم نے کھائی ہے قسم اے جان من

کر لو اقرار محبت پھر ذرا

ہیں بہت غمناک ہم اے جان من

ہم نے اقرار محبت یوں کیا

آپ کا ہو گا کرم اے جان من

زندگی کا لطف پھر آ جائے گا

ایک ہو جائیں جو ہم اے جان من

ہم پریشاں حال ہیں برباد ہیں

کیجیے کچھ تو کرم اے جان من

آپ کی آمد سے یہ ویراں کدہ

بن گیا باغ ارم اے جان من

چشم مے گوں آپ کی مدہوش ہم

کیا یہی ہے جام جم اے جان من

پھر کھلیں گے راز سر بستہ تمام

جان سے گزرے جو ہم اے جان من

جو بھی چاہیں دیجیے اب فیصلہ

ہے سر تسلیم خم اے جان من

سر کے بل جا کر گرے اس جا سے ہم

رہ گیا جب اک قدم اے جان من

دیکھ کر یہ آنکھ تیری نیم باز

مست ہیں سرشار ہم اے جان من

اک نہ اک دن آپ خود آ جائیں گے

توڑ کر اپنی قسم اے جان من

دیکھ لیں وہ سامنے آتا ہے کون

سر جھکائے صبح دم اے جان من

جس قدر ممکن ہو جلد آ جائیے

رہ گیا ہے وقت کم اے جان من

عشق میں آتا ہے اک ایسا مقام

جس جگہ پر ہم نہ تم اے جان من

تم کسی صورت نہ میرے بن سکے

کھا رہا ہے اک یہ غم اے جان من

سیدھے منہ تم بات بھی کرتے نہیں

کیا یہ کھائی ہے قسم اے جان من

کون سنتا ہے سنائیں ہم کسے

اپنی روداد الم اے جان من

ڈھونڈھنے سے بھی نہیں ملتی خبر

ہو گیا ہوں ایسا غم اے جان من

پوچھتے ہو مجھ سے اب کیا حال ہے

پھیر کر نظر کرم اے جان من

تم جہاں چاہو وہاں چھپتے پھرو

ڈھونڈھ لیں گے تجھ کو ہم اے جان من

ہے تمنا اب دل مشتاقؔ کی

زندگی گزرے بہم اے جان من