اٹھا ہے پردہ فقط اک نقاب باقی ہے

اٹھا ہے پردہ فقط اک نقاب باقی ہے

ابھی مزاج میں کچھ کچھ حجاب باقی ہے

ہوا ہے پھر تجھے الفت کا حوصلہ اے دل

کوئے ستم ابھی خانہ خراب باقی ہے

ہزار شکر چھٹے قیل و قال دنیا سے

فقط لحد کا سوال و جواب باقی ہے

ابھی خیال نہ چھوڑوں گا عشق بازی کا

یہی ہیں ولولے جب تک شباب باقی ہے

حلال کر کے وہ کہتا ہے اپنے بسمل سے

تڑپ لے اور ابھی اضطراب باقی ہے

جو تم کو آنا ہے جلد آ دیکھ لوں صورت

فقط دم آنکھوں میں مثل حباب باقی ہے

وصال یار ہو کیا بے تکلفی سے رندؔ

مجھے لحاظ ہے اس کو حجاب باقی ہے