کوئی احسان نہ بھولے گا یہ مولائی کا

کوئی احسان نہ بھولے گا یہ مولائی کا

اشرف الخلق ہی رتبہ ہے پذیرائی کا

میں بھی سرکار کے منگتوں میں گنا جاتا ہوں

یہ بھی انعام ملا ان سے شناسائی کا

سر تو سجدے میں کٹا دل میں حکومت کر لی

مرتبہ دیکھیے کربل میں یہ مولائی کا

دل کی پوچھیں تو کوئی دل میں تمنا ہی نہیں

حال بس آپ ذرا پوچھ لیں شیدائی کا

حسرت دید لیے میں تو تڑپتا ہوں مگر

امتحاں لیتے ہیں وہ میری شکیبائی کا

حوصلہ اور بڑھا اور بڑھا اور بڑھا

جب کسی غیر نے چرچا کیا رسوائی کا

راز الفت کے سبھی پھیل گئے عالم میں

شکریہ آپ کی اس انجمن آرائی کا