koi puchhe na humse kya hua dil

koī pūchhe na ham se kyā huā dil

huā kyā luT gayā dil miT gayā dil

ye kah kar de diyā mujh ko mirā dil

hameñ kosegā degā bad-du'ā dil

qayāmat shoḳh-e-āfat chulbulā dil

mirā dil aur phir kaisā mirā dil

uThegā lutf-e-sohbat kā abhī to

na.e tum ho na.e ham haiñ nayā dil

mazā de jā.egī mujh ko tirī aañkh

mazā de jā.egā mujh ko mirā dil

kisī se yuuñ daġhā karte nahīñ haiñ

are o be-muravvat be-vafā dil

hamārā dil hamāre kaam kā hai

kahāñ paa.eñ tumhāre kaam kā dil

bahut hai jam ko apne jaam par naaz

zarā laanā mirā TuuTā huā dil

use kis muñh se kahte ho burā tum

tumheñ kis muñh se detā hai du'ā dil

ubhar kar daaġh laayā hai nayā rañg

barābar dil ke hai ik dosrā dil

hasīnoñ ko samajhtā hī nahīñ kuchh

'ajab ḳhud-bīñ 'ajab hai ḳhud-numā dil

mileñge hashr meñ dil lene vaale

milegā hashr meñ bichhḌā huā dil

husain is ko burā samjhe bachchī jaan

burā ho kar bahut achchhā rahā dil

gayā vo daaġh de kar daaġh le kar

nishānī de gayā dil le gayā dil

vahī achchhā thā is chhātī kī sil se

kisī but se badal detā ḳhudā dil

ḳhudā ko jaan sauñpī dil butoñ ko

hamāre paas thā kyā jaan yā dil

qayāmat hai tumhārī chulbulī shakl

qayāmat hai hamārā chulbulā dil

tumhārī raah meñ vo bhī paḌā hai

zarā dekhe hue TuuTā huā dil

tire gesū se bill kī le rahā hai

bahut o zulfoñ vaale baḌh chalā dil

koī ab muft bhī ḳhvāhāñ nahīñ haiñ

'riyāz' aisā gayā guzrā huā dil

'riyāz' āñkhoñ meñ phirtī haiñ vo shakleñ

ki miT jaane se jin ke miT gayā dil

koi puchhe na hum se kya hua dil

hua kya luT gaya dil miT gaya dil

ye kah kar de diya mujh ko mera dil

hamein kosega dega bad-du'a dil

qayamat shoKH-e-afat chulbula dil

mera dil aur phir kaisa mera dil

uThega lutf-e-sohbat ka abhi to

nae tum ho nae hum hain naya dil

maza de jaegi mujh ko teri aankh

maza de jaega mujh ko mera dil

kisi se yun dagha karte nahin hain

are o be-murawwat be-wafa dil

hamara dil hamare kaam ka hai

kahan paen tumhaare kaam ka dil

bahut hai jam ko apne jam par naz

zara lana mera TuTa hua dil

use kis munh se kahte ho bura tum

tumhein kis munh se deta hai du'a dil

ubhar kar dagh laya hai naya rang

barabar dil ke hai ek dosra dil

hasinon ko samajhta hi nahin kuchh

'ajab KHud-bin 'ajab hai KHud-numa dil

milenge hashr mein dil lene wale

milega hashr mein bichhDa hua dil

husain is ko bura samjhe bachchi jaan

bura ho kar bahut achchha raha dil

gaya wo dagh de kar dagh le kar

nishani de gaya dil le gaya dil

wahi achchha tha is chhati ki sil se

kisi but se badal deta KHuda dil

KHuda ko jaan saunpi dil buton ko

hamare pas tha kya jaan ya dil

qayamat hai tumhaari chulbuli shakl

qayamat hai hamara chulbula dil

tumhaari rah mein wo bhi paDa hai

zara dekhe hue TuTa hua dil

tere gesu se bill ki le raha hai

bahut o zulfon wale baDh chala dil

koi ab muft bhi KHwahan nahin hain

'riyaz' aisa gaya guzra hua dil

'riyaz' aankhon mein phirti hain wo shaklen

ki miT jaane se jin ke miT gaya dil