طالب جان مرے پہلو میں مرا دل نکلا

طالب جان مرے پہلو میں مرا دل نکلا

جس کو میں دوست سمجھتا تھا وہ قاتل نکلا

جس جگہ امن سمجھ کر میں ذرا جا بیٹھا

میری تقدیر سے وہ بھی در قاتل نکلا

ہو گئی قیس کی خود پوری تمنا اس دم

جس گھڑی نجد میں ناقہ کے مقابل نکلا

زلف اس نے رخ روشن سے ہٹا دی جس دم

لوگ سمجھے کہ گہن سے مہ کامل نکلا

آج مریخ کا کیوں ہو نہ عمل دنیا میں

قتل عشاق پہ ہے خنجر قاتل نکلا

بوسہ پایا ہے شب وصل بڑی دقت سے

کام آسان جو تھا وہ بھی بہ مشکل نکلا

کوئی امید رہائی کی نہ تھی صبرؔ مجھے

ان کی زلفوں سے مقدر میں جو تھا دل نکلا