دل بتوں پر فدا کیا میں نے

دل بتوں پر فدا کیا میں نے

بار الٰہا یہ کیا کیا میں نے

خوں نہ تھمنا تھا آنکھ سے نہ تھما

عقدۂ دل جو وا کیا میں نے

دل نے دردِ آشنا کیا مجھ کو

دل کو صبر آزما کیا میں نے !

اشکِ غم تیرے قطرہ قطرہ کو

گوہرِ مدعا کیا میں نے !

مر گیا دل کی رہ گئیں دل میں

ضبط بے انتہا کیا میں نے !

نزع میں آ کے چھیڑ یہ کیسی

اب تو وعدہ وفا کیا میں نے

خارِ گم دل سے یوں نکل نہ سکا

ریشہ ریشہ جدا کیا میں نے

میکدہ سے چلا گیا مسجد

ارے توبہ، یہ کیا کیا میں نے

صورتِ شبنم اپنے دل کو صفیؔ

مستِ ذوقِِ فنا کیا میں نے