فریب آگہی سے وجد میں ہے رازداں میرا

فریب آگہی سے وجد میں ہے رازداں میرا

کہ جیسے اس کے دل کی چوٹ ہے درد نہاں میرا

کروں پھر عرض جلوۂ حوصلہ اتنا کہاں میرا

فراز طور پر ہو تو چکا ہے امتحاں میرا

میں کیوں صبح ازل سے قصد کرتا شام ہستی کا

نہ تھا معلوم اتنا وقت ہوگا رائیگاں میرا

میں اپنی جان دوں گا حسن سے عہد وفا لے کر

اجل پہلے سے سن رکھے کہ سودا ہے گراں میرا

نہیں احساس اے سیمابؔ مجھ کو عہد پیری کا

خدا رکھے ابھی تو جذبۂ دل ہے جواں میرا