فنا پر اعتبار زندگی مشکل سمجھتا ہوں

فنا پر اعتبار زندگی مشکل سمجھتا ہوں

وہاں مدفن نکلتا ہے جہاں محفل سمجھتا ہوں

نہفتہ خاک محفل میں بھی اک محفل سمجھتا ہوں

ہر اک ذرے کو اک منزل رسیدہ دل سمجھتا ہوں

محبت دل کو مارے یا جلائے حق بہ جانب ہے

محبت ہی کو میں پروردگار دل سمجھتا ہوں

ہزاروں منزلیں طے کر چکا اب اپنی ہستی کو

بہ قدر ہر نفس آسودۂ منزل سمجھتا ہوں

وہی سب سے بڑی نعمت ہے جو مل جائے بے مانگے

سکون دل سے بہتر اضطراب دل سمجھتا ہوں

حریم حسن فردوس محبت کعبہ فطرت

خدا جانے وہ کیا کیا ہے جسے میں دل سمجھتا ہوں

پۓ تکمیل اے سیمابؔ آئے اہل دل کوئی

میں دنیا کو حدیث نا تمام دل سمجھتا ہوں