جنوں وجہ شکست رنگ محفل ہوتا جاتا ہے

جنوں وجہ شکست رنگ محفل ہوتا جاتا ہے

زمانہ اپنے مستقبل میں داخل ہوتا جاتا ہے

رہا ہونا بقید ضبط مشکل ہوتا جاتا ہے

کہ نالہ پھر ہم آہنگ سلاسل ہوتا جاتا ہے

یقین انکشاف راز باطل ہوتا جاتا ہے

کہ میرا ہر قدم اب میل منزل ہوتا جاتا ہے

جہاں میں پھیلی جاتی ہے خاکستر مرے دل کی

جہاں کا ذرہ ذرہ صاحب دل ہوتا جاتا ہے

جسے میں شام غربت اک شگون نحس سمجھا تھا

وہ تارا رہنمائے صبح منزل ہوتا جاتا ہے

اداسی یاس بن کر چھا رہی ہے سارے عالم پر

کسی کا دل ہو اب معناً مرا دل ہوتا جاتا ہے

نیاز عشق مستحسن سہی پھر بھی غلامی ہے

اب اس دستور سے خود حسن بد دل ہوتا جاتا ہے

روا رکھتا ہے دانستہ حروف ساقط و زائد

اب اپنے نقص میں سیمابؔ کامل ہوتا جاتا ہے