نظر کی منزل مقصود مہر و ماہ نہیں

نظر کی منزل مقصود مہر و ماہ نہیں

یہ جلوہ گاہ کے پردے ہیں جلوہ گاہ نہیں

بلا سے ابرو ہوا پر جو دستگاہ نہیں

خدا کا شکر یہاں قحط اشک واہ نہیں

خیال دیر نہیں خوف خانقاہ نہیں

میں جانتا ہوں محبت کہیں گناہ نہیں

جو ایک نقطہ پہ جم جائے وہ نگاہ نہیں

نگاہ وہ ہے جو پابند جلوہ گاہ نہیں

مٹا کے اپنی خودی ماسوا سے کر انکار

سکون روح بجز ذکر لا الٰہ نہیں

الگ ہے سب سے مرا جادۂ سخن سیمابؔ

عوام جس کے ہیں پیرو وہ میری راہ نہیں