فضا پیدا نہیں کرتی کہیں دیوانہ برسوں سے

فضا پیدا نہیں کرتی کہیں دیوانہ برسوں سے

نہیں اٹھتا کوئی پیغمبر ویرانہ برسوں سے

نظر ہے پردہ دار جلوۂ جانانہ برسوں سے

مری نگرانیوں میں ہے تجلی خانہ برسوں سے

وہاں تسکین خاطر چار دن سے حسن آسودہ

یہاں آشوب پہلو اک دل دیوانہ برسوں سے

تعجب ہے جو دنیا اب بھی مے خانہ نہ بن جائے

شراب عشق ہے پیمانہ در پیمانہ برسوں سے

مزاج حسن میں تبدیلیاں پیدا نہیں ہوتیں

محبت گا رہی ہے ایک ہی افسانہ برسوں سے

گزرگاہ وفا میں سر بکف آنا پڑا مجھ کو

پکارے جا رہی تھی ہمت مردانہ برسوں سے

غلامی عشق کی سیمابؔ باقی رہ نہیں سکتی

مجھے اکسا رہی ہے ہمت مردانہ برسوں سے