اے فطرت آوارہ اے جلوۂ ہرجائی

اے فطرت آوارہ اے جلوۂ ہرجائی

کیا علم میں ہے تیرے میرا غم تنہائی

اتنی تو کشش فرما اے شعلۂ سینائی

خاکستر موسیٰ پھر لینے لگے انگڑائی

پھر تیرے تبسم کی نظریں ہیں تمنائی

وہ منتخب اک عشوہ منجملۂ رعنائی

ہیں عشق کے دو نغمے بستانی و صحرائی

رویا تو گھٹا اٹھی گایا تو بہار آئی

جلووں کی تو عادت ہے محجوب نظر رہنا

کچھ تجھ میں بھی جرأت ہے اے چشم تماشائی

اک عمر ہوئی حیراں ہوں تیرے تجسس میں

رہنے بھی دے بس اپنی یہ انجمن آرائی

جب سے مجھے محویت ہے تیرے تصور میں

آسودۂ جلوت ہوں بے منت تنہائی

دیوانوں کی تیرے ہے پابند ہوائے گل

زنجیر بڑھانے کو اٹھے کہ بہار آئی

سیمابؔ غزل گوئی اب اس کے سوا کیا ہے

بے فصل کا اک نغمہ بے وقت کی شہنائی