میں حسن کی نظروں سے جب محو تماشا تھا

میں حسن کی نظروں سے جب محو تماشا تھا

اے بے خودی دل کیا تو نے مجھے دیکھا تھا

یہ میرے تصور میں حیرت کدہ کس کا تھا

اک عالم بے رنگی نظریں تھیں نہ جلوہ تھا

تو وہم میں پردے کے محروم تماشا تھا

پردہ جسے سمجھا تھا غافل وہی جلوہ تھا

ہر حال مرے دل کا اک حال مسلسل ہے

پہلے بھی غم فردا میرا غم فردا تھا

بجلی کی طرح وہ تو لہرا کے ہوئے پنہاں

میں کس سے کہوں میرا مقصود نظر کیا تھا

سیمابؔ محبت کے آلام کا شکوہ کیا

انساں پہ محبت کا انعام بھی کیا کیا تھا