دماغ و روح یکساں چاہئیں انسان کامل میں

دماغ و روح یکساں چاہئیں انسان کامل میں

یہ کیا تقسیم ناقص ہے خودی سر میں خدا دل میں

کبھی تدبیر دریا میں کبھی تجویر ساحل میں

ابھی منزل کہاں الجھا ہوا ہوں راہ منزل میں

یقیناً دفتر کونین تھا مفہوم حاصل میں

وہ اک نقطہ جو پھیلا اور سمٹ کر رہ گیا دل میں

تم اپنے جلوۂ ہر سو کو کیوں رنگ تعین دو

ہمارے وہم کی کیا ہے حقیقت میں نہ باطل میں

زباں بندی سے خوش ہو، خوش رہو لیکن نہ سن رکھو

خموشی بھی مری افسانہ بن جائے گی محفل میں

کہاں سیماب ایسے زندگی افروز ہنگامے

میں کلکتے سے اک طوفان رنگیں لے چلا دل میں