sach bolna bhi ek ibaadat KHuda ki hai

sach bolnā bhī ek 'ibādat ḳhudā kī hai

mash.hūr dāstāñ ye ġhaus-ul-varā kī hai

kahte haiñ ġhaus paak ko jab satrahvāñ thā saal

hāsil kiye the 'ilm-o-'amal meñ ka.ī kamāl

vālid na the hayāt faqat vālida hī thī

kartī thī dekh-bhāl vo ġhaus-e-anām kī

āñkhoñ kā nuur the vahī dil kā qarār the

ġhaus-e-zamāñ bhī maañ ke baḌe jāñ-nisār the

ik samt vālida kī mohabbat thī pyaar thā

ik taraf shauq-e-’ilm se dil be-qarār thā

maañ se judā bhī honā unheñ nāgavār thā

aur dil ke valvaloñ pe bhī kab iḳhtiyār thā

kī ārzū-e-’ilm bayāñ be-kalī ke saath

maañ ko ye sun ke ġham bhī huā kuchh ḳhushī ke saath

vo bolī mere beTe agar hai yahī ḳhayāl

baġhdād jaao 'ilm meñ hāsil karo kamāl

kar lūñgī sabr tum mujhe pyāre ho jaan se

har-dam du'ā.eñ nikleñgī merī zabān se

ruḳhsat ke vaqt maañ ne unheñ chuum kar kahā

dāman bachānā jhuuT se sach bolnā sadā

hazrat ne chūme maañ ke qadam valvale ke saath

baġhdād kī taraf vo chale qāfile ke saath

hamdān se ye qāfila jab aage aur baḌhā

aakar ke un pe hamla luTeroñ ne kar diyā

ab qāfile ko jaan bachānā muhāl thā

sab maal qāfile kā luTeroñ kā maal thā

dāman bharā luTeroñ ne har ek ko luuT kar

ġhaus-ul-varā pe kī na luTeroñ ne yuuñ nazar

kam-’umr the badan pe bhī saada libās thā

phir bhī koī luTerā agar un se pūchhtā

ġhaus-ul-varā ye kahte use muskurā ke haañ

dīnār mere paas haiñ chālīs be-gumāñ

hañste mazāq jaan ke laḌke kā be-ḳhabar

auroñ ke paas lūTne jaate idhar-udhar

hazrat pe jab luTeroñ ke afsar ne kī nazar

pūchhā tumhāre paas bhī hai koī māl-o-zar

us ko bhī yuuñ javāb diyā aap ne kahā haañ

afsar ye bolā dekhūñ vo dīnār haiñ kahāñ

bole janāb-e-ġhaus haiñ zer-e-baġhal nihāñ

Daaku ne jab 'abā ko kyā chaak nā-gahāñ

dīnār gir paḌe to pareshān ho gayā

muñh dekh kar huzūr kā hairān ho gayā

pūchhā janāb-e-ġhaus se afsar ne ai miyāñ

dīnār is se chhupā.e the jab yahāñ

tum ne baġhair zulm ke ab kyuuñ batā diyā

ġhaus-ul-varā ne us ghaḌī afsar se yuuñ kahā

maañ ne diyā thā hukm kiyā maiñ ne jab safar

sach bolnā har haal meñ ai rāhat-e-nazar

is baat kā luTeroñ ke dil par huā asar

ek thartharī sī dauḌ ga.ī un ke jism par

sochā ki maañ ke hukm pe laḌke kī hai nazar

aur ham gunāh karte haiñ allāh ko bhuul kar

ham ne bhulā diyā hai ḳhudā ke jalāl ko

din-rāt lūTte haiñ ġharīboñ ke maal ko

karnā paḌe na qahr-e-ilāhī kā sāmnā

ye soch kar luTeroñ kā dil yuuñ taḌap uThā

tauba kī aur gunā se pashemān ho ga.e

qadmoñ par gir ke sāhib-e-īmān ho ga.e

sach bolna bhi ek 'ibaadat KHuda ki hai

mashhur dastan ye ghaus-ul-wara ki hai

kahte hain ghaus pak ko jab satrahwan tha sal

hasil kiye the 'ilm-o-'amal mein kai kamal

walid na the hayat faqat walida hi thi

karti thi dekh-bhaal wo ghaus-e-anam ki

aankhon ka nur the wahi dil ka qarar the

ghaus-e-zaman bhi man ke baDe jaan-nisar the

ek samt walida ki mohabbat thi pyar tha

ek taraf shauq-e-’ilm se dil be-qarar tha

man se juda bhi hona unhen nagawar tha

aur dil ke walwalon pe bhi kab iKHtiyar tha

ki aarzu-e-’ilm bayan be-kali ke sath

man ko ye sun ke gham bhi hua kuchh KHushi ke sath

wo boli mere beTe agar hai yahi KHayal

baghdad jao 'ilm mein hasil karo kamal

kar lungi sabr tum mujhe pyare ho jaan se

har-dam du'aen niklengi meri zaban se

ruKHsat ke waqt man ne unhen chum kar kaha

daman bachana jhuT se sach bolna sada

hazrat ne chume man ke qadam walwale ke sath

baghdad ki taraf wo chale qafile ke sath

hamdan se ye qafila jab aage aur baDha

aakar ke un pe hamla luTeron ne kar diya

ab qafile ko jaan bachana muhaal tha

sab mal qafile ka luTeron ka mal tha

daman bhara luTeron ne har ek ko luT kar

ghaus-ul-wara pe ki na luTeron ne yun nazar

kam-’umr the badan pe bhi sada libas tha

phir bhi koi luTera agar un se puchhta

ghaus-ul-wara ye kahte use muskura ke han

dinar mere pas hain chaalis be-guman

hanste mazaq jaan ke laDke ka be-KHabar

auron ke pas luTne jate idhar-udhar

hazrat pe jab luTeron ke afsar ne ki nazar

puchha tumhaare pas bhi hai koi mal-o-zar

us ko bhi yun jawab diya aap ne kaha han

afsar ye bola dekhun wo dinar hain kahan

bole janab-e-ghaus hain zer-e-baghal nihan

Daku ne jab 'aba ko kya chaak na-gahan

dinar gir paDe to pareshan ho gaya

munh dekh kar huzur ka hairan ho gaya

puchha janab-e-ghaus se afsar ne ai miyan

dinar is se chhupae the jab yahan

tum ne baghair zulm ke ab kyun bata diya

ghaus-ul-wara ne us ghaDi afsar se yun kaha

man ne diya tha hukm kiya main ne jab safar

sach bolna har haal mein ai rahat-e-nazar

is baat ka luTeron ke dil par hua asar

ek tharthari si dauD gai un ke jism par

socha ki man ke hukm pe laDke ki hai nazar

aur hum gunah karte hain allah ko bhul kar

hum ne bhula diya hai KHuda ke jalal ko

din-raat luTte hain gharibon ke mal ko

karna paDe na qahr-e-ilahi ka samna

ye soch kar luTeron ka dil yun taDap uTha

tauba ki aur guna se pasheman ho gae

qadmon par gir ke sahib-e-iman ho gae