میری حیرت کیوں تجھے منظور ہے

میری حیرت کیوں تجھے منظور ہے

دل میں رہ کر آنکھ سے مستور ہے

اتنا وہ ظاہر ہوا کہ چھپ گیا

بے حجابی کا عجب دستور ہے

کس کا فتویٰ کون سولی پر چڑھا

آپ مفتی آپ ہی منصور ہے

اے عطائے یار میں صدقے تیرے

بے طلب جھولی میری بھرپور ہے

اللہ اللہ کوئے جاناں کی زمیں

ذرہ ذرہ جلوہ گاہِ طور ہے

چشمِ ساقی کی کرامت دیکھیے

آج واعظ بھی نشے میں چور ہے

جلوہ فرما کون ہے یہ مہ جبیں

ساری محفل آج نور و نور ہے

اور تو کچھ بھی نہیں ساجدؔ کے پاس

آپ کی نسبت پہ یہ مغرور ہے