کافر ہیں نہ ہم اور نہ دیندار ہیں یارو

کافر ہیں نہ ہم اور نہ دیندار ہیں یارو

ہم عشق کے مذہب کے پرستار ہیں یارو

اک عمر سے عاشق ہیں ہم اس زلف دوتا کے

اس دام میں مدت سے گرفتار ہیں یارو

جو چاہے کرے جور و جفا ہم پہ وہ دلبر

ہم اس کی محبت کے گنہ گار ہیں یارو

صحت نہیں ہونے کی فلاطوں کی دوا سے

ہم نرگس بیمار کے بیمار ہیں یارو

زندہ ہمیں کر سکتا نہیں ہے دم عیسی

ہم کشتۂ مژگاں دل آزار ہیں یارو

ہر چند کہ وہ لے گیا ہے ہوش ہمارا

پر خوب ہمیں سمجھو کہ ہشیار ہیں یارو

خواہش نہ ہمیں سایۂ طوبیٰ کی ہے ہرگز

ہم بندۂ عشق قد دلدار ہیں یارو

جب سے کہ لگا ہاتھ ہے اس زلف کا يک تار

ہم منحرف از سبحہ و زنار ہیں یارو

مجھ آثمؔ بیدل سے جو پوچھیں گے کہوں گا

ہم تو شہ خادم کے طلب گار ہیں یارو