تو نے مے خانہ نگاہوں میں چھپا رکھا ہے

تو نے مے خانہ نگاہوں میں چھپا رکھا ہے

ہوش والوں کو بھی دیوانہ بنا رکھا ہے

اب یقیناً مجھے معراج محبت ہوگی

میرا سر آپ کے قدموں میں جھکا رکھا ہے

ہر تمنا کو کلیجہ سے لگا رکھا ہے

دل میں تیری ہی محبت کو چھپا رکھا ہے

ہر قدم سجدہ بصد شوخ کیا کرتا ہوں

میں نے کعبہ تیرے کوچے میں بنا رکھا ہے

ناز کیسے نہ کروں بندہ نوازی پہ تری

مجھ سے ناچیز کو جب اپنا بنا رکھا ہے

جو بھی غم ملتا ہے سینے سے لگا لیتا ہوں

میں نے ہر درد کو تقدیر بنا رکھا ہے

یہ تری بندہ نوازی یہ کرم ہے تیرا

مجھ گنہ گار کے عیبوں کو چھپا رکھا ہے

جب بھی دیکھا تمہیں مخمور ہی دیکھا میں نے

جانے کیا آپ نے سالک کو پلا رکھا ہے