رنگ دے اے میرے مولا رنگ دے

رنگ دے اے میرے مولا رنگ دے

رنگ دے اے میرے آقا رنگ دے

یہ لباس زیست ایسا رنگ دے

تا قیامت ہو نہ میلا رنگ دے

رنگ دے اور اس بلا کا رنگ دے

جو فنا میں بھی بقا کا رنگ دے

چین میرے دل کو اس وقت آئے گا

جیسا تو ہے مجھ کو ویسا رنگ دے

بس مجھے تو اب یہی منظور ہے

سب کو رنگ دوں مجھ کو ایسا رنگ دے

اپنے رنگ آرزو میں جان من

میرا دامان تمنا رنگ دے

میری خواہش گو تجھے معلوم ہے

مجھ کو اس سے بھی زیادہ رنگ دے

صدقۂ معراج پاک مصطفیٰ

رنگ دے میرا سراپا رنگ دے

رنگ وہ دے جو کہ ہر اک رنگ میں

اپنی رنگت کا نرالا رنگ دے

اس ولیؔ کو اے خدائے ذو الجلال

وحدت و کثرت کا دو گنا رنگ دے