ساقی سے نگاہیں لڑتے ہی ہم زیست کا ساماں بھول گئے

ساقی سے نگاہیں لڑتے ہی ہم زیست کا ساماں بھول گئے

ساغر کی تمنا ہی نہ رہی پیمانے کا ارماں بھول گئے

ساحل سے تعلق کیا چھوڑا ہم خود سے پھنسے ہیں موجوں میں

کس سمت کو کشتی جاتی ہے کس سمت ہے طوفاں بھول گئے

وہ آہ نہ آئی ہونٹوں تک جس میں کہ تھا سارا راز دلی

ہم کہنے جو بیٹھے قصۂ غم قصے کا ہی کا عنواں بھول گئے

اک شام الم اک صبح الم قسمت سے ملی تھی ان کی قسم

اک خواب پریشاں یاد رہا اک خواب پریشاں بھول گئے

کیوں آج ہے یہ پردہ پوشی کیوں بخشی ہے اس کو مدہوشی

جو رازؔ سے تم نے باندھا تھا شاید کہ وہ پیماں بھول گئے