میری آنکھوں کا آخر دور یہ آزار کیسے ہو

میری آنکھوں کا آخر دور یہ آزار کیسے ہو

تجھے کس طرح سے دیکھوں ترا دیدار کیسے ہو

مجھے دے کر غمِ فرقت خبر میری نہیں لیتے

مجھے اتنا تو بتلا دو مرے سرکار کیسے ہو

دوا جب تم نہیں دیتے شفا جب تم نہیں دیتے

تو آخر پھر سکونِ خاطرِ بیمار کیسے ہو

مرے ساقی یہ بتلا دے ترے میخانے کے صدقے

نظر جس نے ملا لی ہو وہ پھر ہشیار کیسے ہو

فغانِ راز کو اے رازؔ گر تم کیوں نہیں سنتے

کہ وہ کب سے فغاں کرتا ہے تم بیدار کیسے ہو