مجھ کو کافی ہے یہ سنگ در جانانہ مرا

مجھ کو کافی ہے یہ سنگ در جانانہ مرا

یہی کعبہ ہے مرا اور یہی بت خانہ مرا

میں یہ سمجھوں کہ ملی ہے مجھے معراج حیات

گر وہ اک بار بھی کہہ دیں یہ ہے دیوانہ مرا

آج کچھ اشک سے آ کر سر مژگاں ٹھہرے

انہیں اشکوں میں نظر آتا ہے افسانہ مرا

وہی مستی ہے مری اور وہی مدہوشی ہے

وہی ساقی ہے مرا اور وہی مے خانہ مرا

رازؔ اس راز کو کیا سمجھیں گے دنیا والے

میری شاہی ہے یہی حال فقیرانہ مرا