میرے ہی غم کی ترجمان فطرت ہے دیوانہ ہو

میرے ہی غم کی ترجمان فطرت ہے دیوانہ ہو

مجھ کو وہ داستاں سنا جو میری داستاں نہ ہو

عشق جنوں نواز سن تجھ پہ اگر گراں نہ ہو

حسن تو بے نقاب ہے تو ہی جو درمیاں نہ ہو

پیش رہ نگاہ ہے دور کچھ اک غبار سا

جس کی مجھے تلاش ہے یہ وہی کارواں نہ ہو

میری مسرتوں میں تھا جلوۂ دہر بھی شریک

مجھ کو مٹا کے مطمئن اے غم ناگہاں نہ ہو

حسن کی بارگاہ میں جبر کا نام عشق ہے

غم ہو مگر گلہ نہ ہو دل ہو مگر زباں نہ ہو

آتش ضبط سے مفر یوں تو فغاں میں ہے مگر

ہائے وہ ناتواں جسے حوصلۂ فغاں نہ ہو

شعر و ادب کو آج بھی صنف غزل پہ ناز ہے

سعی محال صد شکیلؔ سعیٔ رائگاں نہ ہو