شوق سے ناکامی کی بدولت کوچۂ دل بھی چھوٹ گیا

شوق سے ناکامی کی بدولت کوچۂ دل بھی چھوٹ گیا

ساری امیدیں ٹوٹ گئیں دل بیٹھ گیا جی چھوٹ گیا

منزل عشق پہ تنہا پہنچے کوئی تمنا ساتھ نہ تھی

تھک تھک کر اس راہ میں آخر اک اک ساتھی چھوٹ گیا

فصل گل آئی یا اجل آئی کیوں در زنداں کھلتا ہے

یا کوئی وحشی اور آ پہنچا یا کوئی قیدی چھوٹ گیا

فانیؔ ہم تو جیتے جی وہ میت ہیں بے گور و کفن

غربت جس کو راس نہ آئی اور وطن بھی چھوٹ گیا