بہر‌ گلگشت مرے گھر میں جو یار آ جائے

بہر‌ گلگشت مرے گھر میں جو یار آ جائے

باغ امید میں اک تازہ بہار آ جائے

لطف کھینچ بیٹھنے کا تجھ کو بھی یار آ جائے

میرے قابو میں جو میرا دل زار آ جائے

فاتحہ پڑھ کے مری قبر کو ٹھکراؤ جو تم

چین سے نیند مجھے زیر مزار آ جائے

کروٹیں میں جو بدلتا ہوں تو یہ مطلب ہے

جو پہلو دل مضطر کو قرار آ جائے

دوڑ کر اس کو گلے سے نہ لگاؤں کیوں کر

دیکھ کر خنجر قاتل کو جو پیار آ جائے

جذب دل ہجر میں اتنا تو اثر دکھلا دے

بے طلب آپ مرے گھر وہ نگار آ جائے

اور بھر بھر کے ابھی جام دئے جا ساقی

کہیں ایسا نہ ہو آنکھوں میں خمار آ جائے

نہ سہی فاتحہ ٹھوکر ہی لگاتے جانا

پاؤں کے نیچے جو عاشق کا مزار آ جائے

دل مکدر ہو تو ہونے سے نہ ہونا بہتر

توڑو اس آئینہ کو جس میں غبار آ جائے

دل کی دھڑکن کا یہی ایک ہے دنیا میں علاج

ہاتھ سینہ پہ جو رکھ دو تو قرار آ جائے

وصل منظور نہیں ہے تو لگاوٹ کیسی

اس ادا سے نہ کر انکار کہ پیار آ جائے

چاندنی رات کا پھر جائے نگاہوں میں سماں

بام پر اپنے جو شیریںؔ وہ نگار آ جائے