ساقی نہ کھلے گا در مے خانہ اگر آج

ساقی نہ کھلے گا در مے خانہ اگر آج

مر جاؤں گا ٹکرا کے میں دیوار سے سر آج

امید نہیں ہے شب فرقت میں کہ ہو صبح

پھر شام سے ہوتا ہے وہی درد جگر آج

قاتل سے مٹا دیجیے ہر روز کا جھگڑا

رکھ دیجئے خنجر کے تلے اپنا جگر آج

فرقت تمہیں غیروں کی گوارا ہوئی کیوں کر

حیرت ہے مجھے بھول پڑے آپ کدھر آج

رویا کیا ان گیسوؤں کی یاد میں شب بھر

گزرے اسی آفت میں مجھے چار پہر آج

اے شیریںؔ وہ سودائی ہو کل میری طرح سے

دیکھے جو کوئی جوشش وحشت کا اثر آج