بڑھ جائے عشق ابروئے خم دار اور بھی

بڑھ جائے عشق ابروئے خم دار اور بھی

پڑ جائے ایک زخم پہ تلوار اور بھی

اب تک صدا یہ قبر شہیداں سے ہے بلند

قاتل خدا کے واسطے اک وار اور بھی

میں کیا ہوں میری قدر کریں گے حضور کیا

عاشق ہیں اب تو آپ کے دو چار اور بھی

گرمی میں ساقیا نہ مئے آتشیں کو پی

کمھلا نہ جائیں پھول سے رخسار اور بھی

چھلکا کے جام مے جو دیا آج ساقیا

مدہوش ہو گئے ترے مے خوار اور بھی

قاصد سے حال سن کے مرا بولا وہ حسین

آتے ہیں روز پرچۂ اخبار اور بھی

اے شیریںؔ ہجر یار میں یہ روئے رات بھر

گھر کیا کہ پڑے در و دیوار اور بھی