رونق نہیں فروغ نہیں وہ حشم نہیں

رونق نہیں فروغ نہیں وہ حشم نہیں

جب سے خدا کے گھر بتوں کا قدم نہیں

فصل بہار آئی تو آنے دے اے جنوں

طاقت جواب دے چکی اب مجھ میں دم نہیں

قاصد سے پوچھتا ہے وہ اللہ رے پاس ننگ

خط میں تو شوق وصل کسی کا رقم نہیں

پروا کسے ہے وصل ترا ہو یا نہ ہو

جاتی ہے جان ہجر میں اس کا بھی غم نہیں

آئینہ ہوتا حال ترا مجھ پہ ساقیا

افسوس ہے کہ پاس میرے جام جم نہیں

اے شیریںؔ ان کے ہجر نے آخر کو جان لی

یہ تو سمجھ چکے تھے کہ اس غم میں ہم نہیں