واعظ بتا تو کعبہ میں جا کر میں کیا کروں

واعظ بتا تو کعبہ میں جا کر میں کیا کروں

اللہ سے بتوں کے لئے التجا کروں

میری تو جان جاتی ہے اک بت پہ واعظا

حور جناں کو لے کے تمہاری میں کیا کروں

سب کچھ ملا جو وہ صنم بے وفا ملا

واعظ میں کس زبان سے شکر خدا کروں

ملتا نہیں رقیب سے دل لاکھ کچھ کہو

اے جان جاں میں اپنی طبیعت کو کیا کروں

کر لوں خدا کا ذکر کہ تر ہے ابھی زباں

کب تک بتوں کے نام کا مالا جپا کروں

اے شیریںؔ کوچ جانب ملک عدم ہے اب

کب تک میں انتظار بت بے وفا کروں