وفا سناتی ہے دل کے قصے کبھی زباں سے کبھی نظر سے

وفا سناتی ہے دل کے قصے کبھی زباں سے کبھی نظر سے

جو بات لب تک نہ آ سکی تھی نظر نے کہہ دی مری نظر سے

یہ کس نے پھر ساز دل پہ میرے نئی امنگوں کے راگ چھیڑے

یہ کس نے پھر ایک بار دیکھا مجھے محبت بھری نظر سے

جو کچھ ترے دل کی ہو تمنا وہی مرے دل کی آرزو ہے

جہاں کی ہر شے کو دیکھتی ہیں مری نگاہیں تری نظر سے

تری محبت نے مجھ کو ہر بار اک نئی زندگی عطا کی

کہ دل نے ہر بار تجھ کو دیکھا نئی تمنا نئی نظر سے

نہ جانے کتنی جدائیوں کے اٹھائے صدمے دل حزیں نے

نہ جانے کتنی قیامتیں تھیں گزر گئیں جو مری نظر سے